“சிங்கப்பூர் சென்றதற்கு பதிலாக ஸ்டாலின், கர்நாடகா சென்று கூட்டணியிடம் தண்ணீர் கேட்டிருக்கலாம்” – தமிழிசை சவுந்திரராஜன் காட்டம்!!

தமிழக பாஜக தலைவர் டாக்டர் தமிழிசை சவுந்தரராஜன் வெளியிட்டுள்ள அறிக்கையில் கூறி இருப்பதாவது:-

சிங்கார சென்னையை சிங்கப்பூர் ஆக்குவேன் என்று சென்னை மேயராக இருந்த போது சொன்ன தி.மு.க. தலைவர் மு.க.ஸ்டாலின் அவர்கள்… தற்போது, தான் மட்டும் சிங்கப்பூர் சென்றுவிட்டு வந்து இங்கே தண்ணீர் எங்கே என்று போராடுகிறார்.

சிங்கப்பூர் சென்றதற்கு பதிலாக பெங்களூர் சென்று அவர்களின் கூட்டணி கட்சியான கர்நாடக காங்கிரஸ் நீர் பாசன அமைச்சரிடம் காவிரி மேலாண்மை வாரிய ஆணைப்படி தண்ணீர் திறந்து விட வேண்டும் என்றும் மேகதாதுவில் அணை கட்ட வேண்டாம் என்றும் கேட்டுவிட்டு வந்து இங்கே போராடி இருந்தால் அவரை பாராட்டி இருக்கலாம்.

மக்களின் தாகத்தை அரசியலாக்கி தங்களின் பதவி தாகத்துக்கு போராடுவதா?

இதுபோன்ற தி.மு.க.வின் நாடகங்களை மக்கள் அடையாளம் கண்டு கொள்வார்கள்.

இவ்வாறு அந்த அறிக்கையில் டாக்டர் தமிழிசை சவுந்திரராஜன் கூறி உள்ளார்.