இந்தியாவில் சுமார் 10 கோடி ஏழை குடும்பங்களுக்கு ₹5 லட்சம் வரையிலான மருத்துவ செலவை மத்திய அரசே ஏற்கும் ஆயுஷ்மன் பாரத் திட்டம் சமீபத்தில் துவங்கப்பட்டது.

10 கோடி ஏழைக் குடும்பங்களுக்கு ₹5 லட்சம் வரையிலான மருத்துவ செலவை மத்திய அரசே ஏற்கும் இந்த திட்டத்துக்கு ஆண்டுக்கு ₹12 ஆயிரம் கோடி ஒதுக்கப்பட்டுள்ளது. உலகின் மிகப்பெரிய மருத்துவ திட்டமாகக் கருதப்படும் ‘மோடிகேர்’ என்று ஊடகங்களால் கூறப்படும் தேசிய சுகாதார பாதுகாப்பு திட்டத்துக்குத் தேவையான நிதியில் 60 சதவீதம் மத்திய அரசினாலும், மீதித் தொகையை மாநில அரசும் ஏற்கும்.

மத்திய அரசும், மாநில அரசுகளும் இணைந்து, ஒவ்வொரு ஏழை குடும்பத்துக்கும் ஆண்டுக்கு ₹1000 முதல் ₹1,200 வரை காப்பீட்டுத் தொகையாக செலுத்தி, ஒரு குடும்பத்துக்கு ₹5 லட்சம் வரை இலவச மருத்துவ சிகிச்சை பெறும் வகையில் இந்த மருத்துவ காப்பீடு திட்டம் அமையும். 2018-19-ம் ஆண்டுக்கான நிதிநிலை அறிக்கையில் மத்திய அமைச்சர் அருண் ஜெட்லி இதனை அறிவித்தார். இந்த திட்டத்தின் மூலம் இந்தியாவின் மொத்த மக்கள் தொகையில் 40 சதவீத மக்கள் பயன்பெறுவார்கள். 2011-ஆம் ஆண்டு எடுக்கப்பட்ட சமூக பொருளாதாரம் மற்றும் ஜாதி வாரியான மக்கள் தொகைக் கணக்கெடுப்பின் படி, இந்த மருத்துவக் காப்பீட்டுக்கான பயனாளர்கள் தேர்வு செய்யப்பட உள்ளனர்.

திட்டத்தின் பயன்கள்

1. அரசு மற்றும் அங்கீகரிக்கப்பட்ட தனியார் மருத்துவமனைகளில் எவ்வித ரொக்கப் பரிமாற்றமும் இல்லாமல் சிகிச்சை பெற வசதி.

2. மருத்துவச் சிகிச்சைக்கு முன்பும், பின்பும் ஏற்படும் செலவினங்களை ஜன ஆரோக்கியா திட்டமே ஏற்றுக்கொள்ளும்.

3. குடும்பத்தின் அளவு மற்றும் வயது வரம்பு கிடையாது என்பதோடு ஒவ்வொரு தனி நபரும் பலன் பெற முடியும்.

4. முதல் அறுவைச் சிகிச்சைக்கு அதிக அளவிலான தொகையைச் செலவிடும் ஜன் ஆரோக்கிய யோஜனா, இரண்டாவது அறுவைச் சிகிச்சைக்கு 50 விழுக்காடும், மூன்றாவது சிகிச்சைக்கு 25 விழுக்காடும் வழங்குகிறது.

திட்டத்தின் முக்கிய அம்சங்கள்

1. ஆயுஷ்மான் பாரத்- ஒரு குடும்பத்திற்கு ஆண்டுக்கு ₹5 லட்சம் வரையிலான ஆரோக்கிய காப்பீடு திட்டம்.

2. இதயம், கிட்னி, கல்லீரல் பிரச்சினைகள் உட்பட 1300 வகை நோய்களுக்கு சிகிச்சையளிக்க முடியும்.

3. சமீபத்திய சமூக பொருளாதார ஜாதி கணக்கெடுப்பு படி, 8.03 கோடி ஊரக குடும்பங்கள், 2.33 கோடி நகர்ப்புற குடும்பங்கள் இந்த காப்பீடுக்கு தகுதி படைத்தவர்கள்.

4. குடும்ப உறுப்பினர் எண்ணிக்கை, வயது, பாலினம் குறித்த எந்த தடையும் இந்த திட்டத்தில் இல்லை.

5. குடும்பத்திலுள்ள தகுதி பெற்ற அனைத்து உறுப்பினர்களுக்குமே திட்டத்தின் பலன் கிடைக்கும்.

6. உடல் நலக்குறைவால் ஒருவேளை மருத்துவமனையில் சிகிச்சைக்கு சேர வேண்டி வந்தால் பணம் செலுத்த தேவையில்லை.

7. மருத்துவமனையில் சிகிச்சைக்கு சேர்க்கும் முன்பாக நோய் ஆரம்பித்த காலம் முதல், வீடு திரும்பிய பிறகு வரையிலான செலவுகள் காப்பீட்டில் அடங்கும்.

8. மருத்துவமனையில் சிகிச்சை பெற, அங்கீகரிக்கப்பட்ட ஒரு அடையாள அட்டை தேவை. ஆதார் கட்டாயம் கிடையாது.

9. நாடு முழுக்க உள்ள அரசு மற்றும், அரசு அங்கீகாரம் பெற்ற தனியார் மருத்துவமனைகளில் இந்த காப்பீடு செல்லுபடியாகும்.

திட்டத்தில் பதிவு செய்யும் முறை

தேசிய சுகாதாரத் திட்டத்துடன் இணைந்து இந்தத் திட்டத்தை மத்திய அரசு நடைமுறைப்படுத்துகிறது.

இதற்கான தகுதி மற்றும் பதிவு செய்யும் முறை குறித்து www.abnhpm.gov.in/ என்ற இணையத் தளத்தில் அறிந்து கொள்ளலாம்

எப்படி அணுகுவது?

மாநில ஆரோக்கிய ஏஜென்சி அமைக்கப்பட்டுள்ள மாநிலங்களில்தான் இந்த காப்பீடு திட்டம் அமல்படுத்த முடியும். மருத்துவமனையில் அனுமதிக்கும் முன்பாக அங்குள்ள உதவி மையத்தை தொடர்பு கொள்ள வேண்டும்.

அடையாள உறுதிப்படுத்துதல் பணி மேற்கொள்ளப்படும் சாப்ட்வேர் மூலமாக பலனாளி விவரம் பதியப்படும் என்பதால் எளிதாக மருத்துவமனை நிர்வாகத்தால் பலனாளிகளை கண்டறிய முடியும்.

பலனாளிக்கு இ-கார்டு கொடுக்கப்படும்.

இ-கார்டு மருத்துவரிடம் அளிக்கப்பட வேண்டும்.

நீங்கள் பயனாளியா என்பதை எப்படி உறுதி செய்யலாம்?

இந்தத் திட்டத்தில் பயனாளியா என்பதை https://abnhpm.gov.in என்ற இணையதளத்திலேயே உறுதி செய்து கொள்ளலாம்.

இணையதளத்தின் Am I Eligible என்ற இடத்தில் க்ளிக் செய்தால், உங்கள் தொலைபேசி எண் கேட்டும்.

அதைப் பதிவு செய்தால், அதற்கு 6 இலக்க OTP எண் (ஒருமுறை பயன்படுத்தும் எண்) வரும். அந்த எண்ணைப் பதிவு செய்தபிறகு உங்களின் பெயர், ரேஷன் கார்டு எண், தொலைபேசி எண் ஆகியவற்றைக் குறிப்பிட்டு, நீங்கள் காப்பீட்டுத் திட்டத்தின் பயனாளியா என்பதைக் கண்டறிய முடியும்.

Share